Тыванын билдингир шулукчузу Любовь Иргит ада-иелерге болгаш уругларга снюс, насвай болгаш оон-даа өске никотин холумактыг продукцияның хоразының дугайында тодаргай тайылбыр ажылын чорударын сүмелеп турар.
Тыванын билдингир шулукчузу Любовь Иргит ада-иелерге болгаш уругларга снюс, насвай болгаш оон-даа өске никотин холумактыг продукцияның хоразының дугайында тодаргай тайылбыр ажылын чорударын сүмелеп турар.
Тодарадып, шегледиңер
Чурумалдыг каас байлак чуртталгавыс,
Чурумчуткан хоойлунуң шыңгыы боорун,
Чонувуска, ажы-төлге таныштырып,
Чугаа сооттуг тайылбырны кылза чогуур.
"Чүге?"-деп-даа айтырыгны салыксааннар,
Чүүден ынчап барганын-даа биликсээннер,
Чонувустуң аразындан азы менден,
Чугаалажып айтырза-даа харыым чаңгыс!
Кара таакпы, ажыг суг дээш кедерезе,
Карамельдер, соруп чиир-даа чигир аймаан,
Саат ышкаш дайнай кааптар "жевачкалар"
Садып саарар улус черле көвүдээн-дир.
"Чүге?"- деп ам база катап айтырзыңза,
Чүдек багай бүдүмелдер, хораннарны,
Амдан киирип холуп алгаш бүдүргештиң,
Арат-чонга, ажы-төлге саткан боор тур!
Айыыл халап, өлүм чидим болдурбас дээш,
Ажы-төлдү чажындан-на оваарнырын,
Аксым бар дээш чүзүн баазын карамельди,
Аскынче суп амзаптарын шеглетсе чүл?
Арагада, таакпыда хоран холуп,
Ажырымчы хоптактарның үүлгедиинден,
Делегейде чеже кижи чуртталгазын,
Демгилерден садып алгаш хораннанган?!
Ынчангаштың чагыым база сүмем болзун,
Ындыг багай чаңчылдардан ойталаңар,
Ырак-чоока каяа-даа бол садыглангаш,
Ылап арыын тодараткаш садып чиңер!
Любовь Иргит 26.01.2020ч., Кызыл хоорай.
