Аал-коданнарда шагааның байырлалдарынче Өвүр кожууннуң удуртукчу даргалары, сумуларның кураторлары, чагырыкчылары үнүп турар
Аал-коданнарда шагааның байырлалдарынче Өвүр кожууннуң удуртукчу даргалары, сумуларның кураторлары, чагырыкчылары үнүп турар. Суй-белектерни, кадактарны, байыр чедириишкин бижиктерин тыпсып, тергиин малчыннарны, улуг өгбелерни, шылгараан ишчилерни алгап-мактап, чолукшулга ёзулалын чорудуп турарлар. Тыва оюннарны аал бүрүзүнде ойнап, чемниң чаагай дээжизи-биле аалчыларны хүндүлеп, чымыштыг ажыл-иштиң кижилери Шагаа байырлалында шымны берген чоруп турарлар.
Тыва чоннуң салгалдан-салгалче дамчып келген мал азырап чоруур ажыл-иштиг кижилерже сагыш салыышкын улуг, кичээнгей шынгыы дээрзин чазак-чагырга чугаалап, деткимчелерни чорудуп турары өөрүнчүг. Аңгы-аңгы төлевилелдерге киржип, мал-маган азырап эгелээн өг-бүлелер Өвүр кожуунда эвээш эвес.
