ТЫВАНЫҢ В. КӨК-ООЛ АТТЫГ ХӨГЖҮМ-ШИИ ТЕАТРЫНЫҢ УЛУСЧУ ТЕАТРЛАР-БИЛЕ СЫРЫЙ АЖЫЛДАЖЫЛГАЗЫ
2018 чыл Тываның чүгле профессионал театрларынга эвес, а кожуунарның улусчу театрларынга дүжүткүр чыл болган. База ол ышкаш республиканың бот-тывынгыр театр коллективтеринге шии тургузарынга күрүне деткимчезин көргүскени кончуг улуг өөрүшкү. Ооң-биле чергелештир кожууннарда театр уран чүүлүн сайзырадып чоруур коллективтерге чогаадыкчы болгаш методиктиг дузаны чедирерин Тываның национал театры хүлээнип алган.
Күрүне деткимчезиниң ачызында Чөөн-Хемчик кожууннуң улусчу театрынга коллективтиң уран чүүл удуртукчузу Марианна Кара-Сал А. Островскийниң "Орулгалыг албан-дужаал" деп классиктиг чогаалын тургускаш, Тыва национал театрның сценазынга бараалгаткан. Шиини тургузарынга чогаадыкчы дузаны Тываның хөгжүм-шии театры чедирип, арга-сүмези-биле үлешкен.
Барыын-Хемчик кожууннуң Кызыл-Мажалык суурнуң хөгжүм-шии театрынга Салим Сюрюн-оолдуң "Озалааш хем" деп чогаалынга үндезилээн "Сегитмаа" деп шиини Национал театрның режиссеру, Тываның алдарлыг артизи Леонид Каң-оол тургускан.
Ол-ла кожууннуң Эрги-Барлык сумузунуң улусчу театры Владимир Серен-оолдуң "Амыдыралдың хээлери" деп шиизиниң "Алдагдал" деп кезээн салган. Режиссеру Тываның алдарлыг артизи Орлан Монгуш. Чурукчузу - Национал театрның кол чурукчузу, Тываның улустуң чурукчузу Начын Шалык.
Бо ийи шиини Республиканың улусчу чогаадылга төвүнге удурткан уран чүүл чөвүлелинге ноябрь 26-да дужааган.
Ол-ла чогаадыкчы агымдан Өвүр болгаш Мөңгүн-Тайга кожууннар база чыда калбаан.
Мугур-Аксының улусчу театры Кызыл-Эник Кудажының "Инчеек" деп шиизин амгы үе-биле езулуг дүгжүп турар кылдыр тургускан. Режиссеру - Чойгана Донгак, чурукчузу - Начын Шалык. Ноябрь 27, 28 хүннеринде шииниң баштайгы көргүзүглери шыгырт долу көрүкчүлерлиг байдалга эрткенин магадал-биле демдеглевес арга чок.
Өвүр кожууннуң Хандагайты суурунда улусчу театрга Национал театрның режиссеру, Тываның уран чүүлүнүң алдарлыг ажылдакчызы Марина Идам "Ынаар ырак" деп Вилена Ооржактың чогаалдарының чыындызынга үндезилеп шиини салган. Ооң баштайгы көргүзүү декабрь 6-да болуп эрткен.
Республиканың улусчу чогаадылга төвүнүң улусчу театрларның чаа тургускан шиилерин хүлээп алыр комиссиязының кежигүннери биле Национал театрның чогаадыкчы ажылдакчылары кожууннарже үнүүшкүннерге киржип, бот-тывынгыр коллективтерниң ажыл-ижинге бедик үнелелди берген.
Чуруктарда: 1. Барыын-Хемчик кожууннуң хөгжүм-шии театрының "Сегитмаа" деп шиизинден кадр.
2. Мөңгүн-Тайганың улусчу театрының "Инчеек" деп шиизинден көргүзүг.
