Өгбелеривистиң бурунгу байырлалы чаа чылды уткаан Шагааны Дус-Даг сумузунда МУБ Торгалыгның малчыннары Чозаның Согуна даа, Хадыыр
ШАГНЫҢ ЧААЗЫ - ШАГАА ЧААГАЙ.
Чараш солун чаңчылывыс - Шагаа айы моорлап келди.
Тевек ойнап, тоолдажып, тейден бадып хөглээлиңер.
Өгбе шаандан туруп келген, өглер санай үнчүп киржип,
Өндур чаагай байырлалда өөрушкүлүг чолукшуулу!
Өгбелеривистиң бурунгу байырлалы чаа чылды уткаан Шагааны Дус-Даг сумузунда МУБ Торгалыгның малчыннары Чозаның Согуна даа, Хадыыр тайга эдээнде Чирик деп черинге демдеглеп эрттиргеннер. Аалдың ээзи Артыш Натпит-оол - Торгалыг совхозка ажылдап чораан кырган ада-иезиниң кыштаанда мал-маганын тудуп чоруур МУБ-туң аныяк малчыны. Өгбелериниң соон салгап, малчын болуп чоруурунга чоргаарланыр, хүндүлээчел, биче-сеткилдиг Артыштың аалынга чымыштыг ажыл-иштиң кижилери чыылган. МУБ Торгалыгныг удуртукчузу Алексей Анай-оолович Донгак ажылдакчылары-биле малчыннарын хүндүлеп, чолукшуп, оюн-тоглааны эрттиргеннер.
Чайның изии, кыштың соогу дивес кара даң-бажындан орай кежээге чедир мал азырап чоруур малчыннарга байыр чедирип кожуун чагырга даргазы Аржаан Никифорович, кожуун Баштыңы Андрей Ангыр-оолович, көдээ ажыл-агый эргелелиниң даргазы Хулер-оол Херел-оолович белек-селектерни сөңнеп четкеннер.
Аалга чыылганнардан эң-не улуг назылыг Зоя Кирововна Натпит-оол, Татьяна Найдыповна Монгуш, Уран Шуур-ооловна Куулар бүгү назынында мал соондан кылаштап, онча-менди азырап, шаандакы болгаш амгы үени деңнеп чугаалажып олурганы солун болган.
Кайгамчыктыг чылыг хүнде Ак-Кара-Суг, Чоза, Кара-Даг, Ховужук, Улуг-Кадыгбай деп черлерден малчыннар чыглып келгеш, бот-боттары чолукшуп, Шагааның чаагай аъш-чемин чооглап, хүндүлежип, ойнап-хөглеп хүнзээннер. Улуглары аът эзертеп, хендирбе сый шаап, тывызыктажып, чинчи чажыржып ойнаан, а чаштары дагдан чуңгуулаан.
Малчыннарны деткип Дус-Даг сумузунуң удуртулгазы, культура бажыңының болгаш библиотека ажылдакчылары база келгеннер. База ол ышкаш кожууннуң төп эмнелгезинден база Дус-Даг сумузунуң участок эмнелгезиниң эмчилери көдээ ишчилерниң кадыкшылын хынап, арга-сумезин берип, дораан эм-дом бээр кижилерге дузазын катканнар.
Шагаа байырлалын эки уткуп, буянныг эки чүүлдер доктаар болзун, кадыкшылыңар быжыг болзун, мал-маганыңар өзүп-көвүдезин! Курай-курай!!!
#шагаа #шагааовур #овюрдусдаг #шагаатыва
