Клубтуң директору Бежендей Донгак кожуун чагыргазы, культура эргелели-биле деңге суурунуң чонунга культура бажыңын чаа оран-сава-биле орнап кылып бээри-биле 2022 чылда документилерин четчелеп, төлевилелге киржири-биле ажылдарны чедип алган турган. 2023 чылдың эгезинде, чазын Ак-Чыраа суурга (Сарыг-Хөл сумузу) чаа клуб тудуунуң ажылдары эгелээн. Бежендей Бурбужалович коллегалары-биле, суурнуң чурттакчы чону-биле демнежип тургаш, тудугну шалыпкын эгелээн. Суму чагыргазы база ооң иштинде коллективтерден ангыда кожууннуң суурларындан организациялар база үлүг-хуузун киирип дузалашканнар. Ак-Чырааның херээжен чону, арбаннар катчып алгаш тудугжуларны хүн бүрүде чемгерип турганнар.
Тываның Чазаа, культура яамызы тудуг материалдары-биле хандырып, херек чүүлдерни садып берген түңнелинде, чоннувус демнежип тургаш, чаа клубту чанында библиотека-биле катай турар кылдыр тудуп доосканнар.
Байырлыг ажыдыышкынынга Тыва Чазактың болгаш культура аямызының мурнундан Виктор Сергеевич Чигжит аалдап келген. База Национал библиотеканың директору Ирина Алексеевна Эртине, республиканың бичии уруглар ном саңының директору Сылдысмаа Борисовна Лопсан, Өвүр кожууннуң Баштыңы Анай-Хаак Ивановна Лопсан-Серен, кожуун чагырга даргазының оралакчызы Чодураа Даан-ооловна Шойдан, культура эргелелиниң даргазы Айдыс Даржай байыр чедирип, клубтуң директору Бежендей Бурбужаловичиге, ном саңының эргелекчизи Наталья Оссур-ооловна Лопсанга келген аалчылар суй-белектерни бергеннер.
Чаа клубтуң база бир маадырлары тудугжуларга алдар-мактал. оларга хүндүлүг бижиктерни, өөрүп четтириишкин бижиктерин тывыскан.
Ажыдыышкынга кожууннуң сумуларның клубтарының коллективтери, төп библиотеканың ажылдакчылары, кожа чыдар Оо-Шынаадан коллегалары концерт номерлерин бараалгадып, байыр чедиргеннер. Ак-Чырааның клубка, библиотекага ажылдап чораан хоочуннар кончуг солун сактыышкыннарыны кылып, ол үе-биле амгы үени деңнеп, суурнуң канчаан хөгжүп келгенин магадап чугаалап турганнар.
Кызылдан келген хүндүлүг артистеривисти демдеглевес арга чок, онзагай номерлерни бараалгадып чонга аян тутканнар.
Келген аалчы бүрүзү чаа культура одааның коллективинге чогаадыкчы чедиишкиннерни, культура-массалыг хемчеглер, концерттер, бөлгүмнер үргүлчү диңмиреп ажылдап турар болзун деп йөрээлдерни салган.
Клубтуң директору Бежендей Донгакка Тыва Республиканың культуразының болгаш уран чүүлдүң хоочуну, Өвүр кожууннуң хүндүлүг чурттакчызы деп аттарны тывысканы чоргааранчыг болган.
Счетчик обращений граждан и организаций
ПОСТУПИЛО 21 НА РАССМОТРЕНИИ 6 РЕШЕНО 15
Тывада чарлаттынган эп-сеткил каттыжыышкынының чылында Сорунза деп губернатор төлевилели-биле Ак-Чыраада чаа культура одаа ажыттынган. Кожуунувустуң бичии суурунга чараш культура одаа туттунуп келгенинге Тываның Чазаанга, культура яамызынга улуу-биле четтиргенивис илередир-дир бис.
Последнее обновление: 01.03.2024
