«ТЫНЫМ БОЛГАН ТЫВА ДЫЛЫМ!» (түңнел)
Тыва дыл хүнүнге тураскааткан «ТЫНЫМ БОЛГАН ТЫВА ДЫЛЫМ!» деп республика чергелиг мөөрейниң түңнел кезээ Тыва үндезин культура төвүнге болуп ноябрь1-де болуп эрткен.
Бо чылгы «ТЫНЫМ БОЛГАН ТЫВА ДЫЛЫМ!» деп мөөрейниң кол сорулгазы - Тыва Республикада тыва дылды камгалаары, сайзырадып, хөгжүдери, бичии уруглар чогаалын сайзырадыры, уругларга чогаал бижип чоруур аныяк чогаалчыларның ажыл-ижин деткиири.
Бо чылгы чарлаттанган мөөрейге ниитизи-биле республиканың аңгы-аңгы булуңнарындан Кунгуртуг, Дус-Даг, Хандагайты, Кызыл-Даг, Ак-Довурак, Шагаан-Арыг, Сукпак болгаш Кызыл хоорайдан 21 автор киришкен.
Республика чергелиг мөөрейниң жюри кежигүннеринге Россияның чогаалчылар эвилелиниң кежигүнү, чогаалчы, очулдурукчу, «Сорунза» деп аныяк чогаалчылар бөлгүмүнүң удуртукчузу, Тываның күрүне университединиң литературлуг музейиниң удуртукчузу Мария Амын-ооловна Күжүгет, филология эртемнериниң кандидады, Тываның күрүне университединиң тыва филология болгаш ниити дыл эртемнери кафедразының доцентизи, тыва уруглар чогаалының шинчилекчизи Екатерина Тамбыевна Чамзырын база Тыва Республиканың алдарлыг артизи Айдаш Иванович Барыңмаа чогаалдарны номчуп, түңнелдерни үндүрген.
«ТЫНЫМ БОЛГАН ТЫВА ДЫЛЫМ!» деп республика чергелиг мөөрейниң
дээди шаңналын Тываның күрүне университединиң филология факультединиң 5-ки курузунуң сургуулу, "Мөөрей" деп уругларга бижээн тоолдуң автору Ондар Мөнгүн-Сай чаалап алган.
Мөөрейниң тускай шаңналдарын жюри кежигүннери дараазында авторларга тывыскан:
«Уругларның шүлүк чогаалынче дидим базым» деп тускай шаңналды чаштарга бижээн «Уруум ынак ойнаар-кызы», «Көгүдүг», «Чаштарга тывызыктар» деп шүлүктерниң автору, Өвүр кожууннуң Геннадий Тумат аттыг культура төвүнүң методизи, Монгуш Сайсу Солаановна төлептиг болган.
«Эжишкилер найыралы» деп тускай шаңналды Бай-Тайга кожууннуң Бай-Тал суурундан «Эжишкилер найыралы» деп уругларга бижээн шүлүктүң автору, Сайзана Алексеевна Хертекке тывыскан.
«Уругларга чогаадыкчы көрүш» деп тускай шаңналды «Шаолинь» деп уругларга бижээн чечен чугааның автору, Кызылдың педагогика колледжиниң башкызы, Куулар Орлан Борисовичиге тывыскан.
«Чаштар делегейи» деп тускай шаңналды уругларга хой санныг шүлүктерни бижээн автор, Иргит Любовь Иргитовнага тывыскан.
Мөөрейниң тиилекчилеринге акша сертификаттарын болгаш шаңнал бижиктерни сөңнээн. Мөөрейге чогаалдары киришкен автор бүрүзүнге киржикчиниң сертификадын тывыскан.
Мөөрейниң түңнел кезээниң аалчылары болгаш киржикчилеринге "Тыва дылга, чугаалажып, хөөрежиили!" деп хемчег болуп эрткен.
Ужуражылганың киржикчилеринге Тыва үндезин культура төвүнүң ажылдакчылары тыва дылдың өске дылдардан ылгалын, тыва бижиктиң төөгүзүн тайылбырлап, тыва улустуң мендилежир ёзулалын сайгарганнар. Ужуражылганың солун кезээнге тыва улустуң тывызыктары болгаш "Матпаадыр" деп оюнунуң чижээнге тыва дылдың бай-байлак чажыттарын чугаалашканнар.
Тыва дыл хүнүнге тураскааткан мөөрейниң тиилекчилеринге Тыва үндезин культура төвүнүң "ДЭЭРБЕ" бөлгүмү хөгжүмнүг байырны чедирген.
Тыва үндезин культура төвү Тыва дыл хүнүнге тураскааткан «ТЫНЫМ БОЛГАН ТЫВА ДЫЛЫМ!» деп республика чергелиг мөөрейниң киржикчилеринге өөрүп четтиргенин илередип база изиг байырны чедирип тур бис!
Өзүп орар чаштарывыска, келир үениң салгалынга чогаадыкчы салым-чаяаныңарны сөңнеп, оон-даа улам сайзырап, демир-үжүүңер ылгын, үнүңер өткүт болурун күзедивис!
#тыва_дыл #Деньтувинскогоязыка #тыва_топ #конкурс #дети
