Администрация муниципального района «Овюрский кожуун Республики Тыва»

Саглы сумузунда МУБ Адарганның малчыннары Донгак Сергей Калбакович, Мария Тюлюшовнанын Даштыг-Одек деп черде турар кыштаанга Шагааны уткаан байырлал болуп эрткен.
МУБтуң малчыннарынга кожуун чагырга даргазының мурнундан байыр чедирип экономика талазы-биле оралакчызы Өнермаа Ооржак, специализи Чаяна Иргит, көдээ ажыл-агый эргелелиниң агроному Аяна Куулар чолукшуп четкеннер. База ол ышкаш кожууннуң Даа ламазы Шолбан башкы номнал номчуп, чер кырында бүгү-ле амылыгларга эки чүүлдерни күзеп, үнүп келир Күске чылында өг-бүле бүрүзүнге буян-кежик доктаар болзун деп йөрээген. 
Тергиин малчыннар Шагаа таварыштыр шаңнадып, аъш-чемниг белектерни алганнар. 
Адарганның удуртукчузу, "Куш-ажылдың кижизи" деп аттың хүндүлүг эдилекчизи Владимир Сагаанович Ооржак малчыннарын чыып, эрткен чылды кысказы-биле түңнеп, эки чедиишкиннерин чоргаарал-биле чугаалап, "Кожуунувусту, республикавысты сайзырадып, малывыс бажын моон-даа хөй болур кылдыр кызымаккай ажылдаар бис, аныяк шудургу малчыннар бүдүрүлгевисте эвээш эвес. Республика Наадымында мөөрейлерге үргүлчү киржип, тиилекчи болуп чоруурлар бисте болгай!" деп чугаалаан. 
Бо чылын чаа малчыннап кирген аныяк малчыннарга дузаламчы кылдыр чүген, чулар, хүн-биле ажылдаар батарейлиг фонарьларны кошкар кадарчызы Ооржак Чалбаага, сарлык кадарчызы Ооржак Мергенге, төруур хойлар кадарчылары Саая Мерген, Монгуш Буянага бергеннер. 
Дошка чарыш, тевек, аът шалбадаары, дөрт берге деп оюннарны ойнап, кожамыктар болгаш тыва хеп мөөрейин эрттирип, эрткен чылдарга бодаарга онзагай демдеглээннер. Оюн-тоглааның тиилекчилери амыдыралга ажыктыг белектер-биле шаңнатканнар.

Өнермаа Ооржак
Чагырга даргазының оралакчызы, Саглы сумузунуң куратору